Banner

 

බදුල්ල දිස්ත්‍රික්කයේ ඇල්ල ප්‍රාදේශිය ලේකම් කොට්ඨාශයේ මහ සල් ගසක් වූ අතර සල් ගසේ සෙවනින් මහා ප්‍රදේශයක් ආවරණය විය. එසේ ආවරණය වූ ප්‍රදේශ සල්පේ ලෙස හැඳින්වු අතර පසු කාලීනව සලපේ හල්පේ ලෙස ව්‍යවහාර කරන්නට පටන්ගත් බව ගමේ ඉපැරණි ප්‍රභූවරුන් පවසයි. හල්පේ පමණක් නොව අවට ගම් රැසක දරු දරියන්ට සිප්හලක අඩුව දැනෙන්නට පටන් ගත්තේ මේ කාලෙය්දීය.

            පත්තිනි දේවාලය අසල කුඹුරු ඉඩමේ මානා හෙවිල්ල සෑදු මඩුවේ ආරච්චි මහතා, ලේකම් මහතා හා වෙද මහතා ඇතුළු සිසුන් 12 දෙනකුගෙන්ද එක් ගුරු මහ‍තෙකුගෙන් ද ආරම්භ වූයේ හල්පේ ශිල්ප ශාලාවයි. 1878 බැනියමත්, සරමත්  ඇඳගත් මුල්ම සිසුන්ද චිත්තය හැට්ටය ඇඳගත් මුල්ම සිසුවියන්ද සිප් හැදැරු මඩුවේ කොනක වඩු කර්මාන්තය උගන්වන්නට වෙන්කර තිබුණි. කාලයත් සමග කුඹුරු ඉඩම ප්‍රමාණවත් නොවන බව දැනුන එවක ගම්මුලාදැනි වු ජී.ජී. මුදලිහාමි මහතා තමාගේ පෞද්ගලික ඉඩම පාසලට පරිත්‍යාග කෙල්ය.

එම ඉඩමේ ද මනා අතු හෙවිල්ල සෑදු ගොඩනැගිල්ලක් හා ඊට ම අල්ලා සෑදු ගුරු නිවාසයක් වෙතට හල්පේ සිප්හල ගෙන එන ලදි. මුල් ගුරුතුමා හා ඔහුගේ බිරිඳ වාසය කළේ එම ගුරු නිවාසයේය. ගුරුවරයා හා බිරිඳ අතර ඇතිවු අමනාපයක් හේතුවෙන් රෑ පලාගිය බිරිඳ සෙවීමට පන්දමක් රැගෙන ගුරුතුමා පාසල පුරා ඇවිද්දේය. හදිස්සියේ වහලකට ගිණි ඇවිලුණු අතර සම්පුර්ණ ගොඩනැගිල්ලම විනාශ වී ගියේය. මේ සිදුවීමෙන් පසුව එවක රජය විසින් එම පාසලට දැනට පවතින පැරණිම ගොඩනැගිල්ල වන ටකරන් සෙවිල්ලු ගොඩනැගිල්ල සාදා 1925 දී පාසලට පවරා දෙන ලදි.


බොහෝ කාලයක් යන තුරු ශිෂ්‍ය ශිෂ්‍යාවන් 100කට අඩු අතර එකම ගොඩනැගිල්ලක අකුරු කරන ලදි. එවකට හාලිඇල හා බණ්ඩාරවෙල අතර තිබු එකම පාසල හල්පේ පාසල වූ අතර එය අවට ගම් කිහිපයක දරු  දැරින්ගේ නැණස පැදීමේ භාරධූර  කාර්යය කරපිටට ගත්තේය.


එහෙත් 1970 දශකයේ නිළ ඇඳුම ලැබෙන තුරු ස්ථිර නිළ ඇඳුමක් නොලැබිණි. වර්ණවත් ගවුම් ළමාසාරි ආදිය අදිමින් පාසලට පැමිණිමට සිසුන් පුරුදුව සිටියහ.


1929 දී කණිටු විදුහලක වු මෙම විදුහල 1965 දී මහා විද්‍යාලයක් බවට උසස් කරන ලදි. 1994.03.02 දින ජාතික පාසලක් බවට පත් කරන ලදි. මේ අනුව විදුහලේ උසස් පෙළ විද්‍යා අංශය ආරම්භ විය.


ප්‍රථම වරට විශ්ව විද්‍යාලයට බිහි වු ශිෂ්‍යයා 1974 වර්ෂයේදි බිහිවීමත්, උසස් පෙළ වාණිජ්‍ය අංශයේ බදුල්ල දිස්ත්‍රික්කයේ පළමු වෙනියා 2010 වර්ෂයේදි මෙම පාසලෙන් බිහිවීමත් විදුහල් ඉතිහාසයේ වැදගත් සිදුවිම් දෙකකි. 1974 සිට 2010 දක්වා විශ්ව විද්‍යාල වරම් ලැබු සිසු සිසුවියන් අපමණය. මේ වන විට විදුහල්පතිවරු 14 දෙනෙකු විදුහල පාලනය කර ඇත.


2012 වර්ෂයේදි පාසල ද්විතීයික පාසලක් වශයෙන් සංවර්ධනය කිරිම සදහා තෝරා ගත් අතර අද වන විට ද්විතීයික පාසල් සංකල්පයේ ඵල නෙලාගනිමින් සිටි අනාගතයේදි මෙම විදුහල බ/හල්පේ මධ්‍ය මහා විද්‍යාලය (ජාතික පාසල) ද්විතීයික පාසල වශයෙන් නම් කෙරේ.